ஜென்ஸீக்களுக்கான, ஆகவே தேவையற்ற (அவர்கள் எங்கே பத்துவார்த்தைகளுக்கு அப்பால் படிக்கப் போகிறார்கள், எனிவே அவர்கள் படிப்பார்கள் என, மனப்பால் குடிப்பது ஒருமாதிரி வோக்கே?) குறிப்பு: கீழே வரும் “பாரி” மற்றும் “மன்னர்” ஆகியோர் நிஜ நபர்களின் கருத்துகளைப் பதிவு செய்யும் ஆவணபூர்வ வடிவங்கள் அல்ல, ஏன் – கோவணபூர்வம் கூட இல்லை –  பிரச்சினை என்னவென்றால், ப்ளடி ஆரியர்கள் அதையும் உருவிவிட்டார்கள், பாவிகள்!

மேலும் இந்த உண்மை உரையாடலின் சாரம் – தமிழ் இணைய உலகில் பெருமளவில் காணப்படும் பாடு (படுத்தும்) பொருட்களான சதித் திட்டம், பொய் வரலாறு, புளுகு அறிவியல், “எல்லாவற்றையும் மறைத்துவிட்டார்கள்” வகைச் சொல்லாடல்களை மிகைப்படுத்தி உருவாக்கப்பட்ட கேலிச்சித்திர வடிவம்… (இந்த எழவை எல்லாம் சொல்லவேண்டியிருக்கிறதே, இல்லாவிட்டால் இந்த உண்மைகளைப் பொய் என்று நம்பிவிடுவார்களே, என் ஏழரைத் தமிழர்கள் என்பதை நினைத்தால்…. ….)

சரி. ஆங்கிலப் பதங்களை முடிந்தவரை ஆங்கிலத்திலேயே கொடுக்கிறேன். தமிழ்மொழி வாழ்க!

(எது எப்படியோ… இவ்வுரையாடல் நடைபெற ஸ்டூடியோ உபகரணங்களையும் நடத்துமிடத்தையும் கொடுத்த ‘இது கிழக்கு ந்யூஸ் – நான் பத்ரி சேஷாத்ரி” அவர்களுக்கு என் நன்றி.

இதன் விடியோவையும் ஸென்ஸார்/தணிக்கை செய்யாமல் வெளியிட்டால் அகமகிழ்வேன்!)

ஏலியன்களுக்கு முன்பே எலியன்ஸ்!

பாரி: வணக்கம் தமிழர்களே. இன்று நான் பேசப்போகிற விஷயம் சாதாரண விஷயம் கிடையாது. இதைப் பேசினதுக்குப் பிறகு இந்த வீடியோ YouTube-ல இருக்குமா என்பதே சந்தேகம். ஏனென்றால் இது NASA, CIA, RAW, Mossad, Illuminati, World Economic Forum, Discovery Channel, National Geographic தமிழ் பிராம்மணர்கள் என  எல்லாரையும் நேரடியாகப் பாதிக்கும் தகவல்.

மன்னர்: ஒரு நிமிஷம். RAW எதுக்கு?

பாரி: அதுதான் உங்களுக்கு இன்னும் geopolitics புரியலைன்னு சொல்றேன். RAW இல்லாம எந்த conspiracy-யும் complete ஆகாது.

மன்னர்: சரி. Continue.

பாரி: இன்றைய கேள்வி: Alien என்றால் யார்? நமக்கு Alien என்று சொல்லிக் கொடுத்தது Hollywood. ஆனா தமிழ் மொழியில்? அது… …எலியன்!

மன்னர்: ஏலியன்? எலியன்??

பாரி: அதுதான் trap! நீங்கள் ஏற்கெனவே pronunciation colonialism-க்கு பலியாகிட்டீங்க.

தமிழ் உயிரெழுத்தைப் பாருங்க: அ ஆ இ ஈ உ ஊ எ ஏ ஐ ஒ ஓ ஔ.

இதுல எ முதல்ல வருதா? ஏ முதல்ல வருதா?

மன்னர்: எ! ஓஓஓஓஓஓஓ!!!

பாரி: அப்ப முடிஞ்சுது! எலியன்ஸ் ஏலியன்ஸுக்கு முன்னாடி வந்தவங்க!

மன்னர்: என்னது?!

பாரி: Evolutionary sequence! பரிணாம வளர்ச்சியின் பரிமாணம்… அதுமட்டுமில்லை – இனமாணம்!!

முதல்ல எலி. அதுக்கப்புறம் எலியன். அதுக்கப்புறம் vowel elongation நீட்சி ஏற்பட்டு ஏலியன்.

இதுதான் Darwin கூட சொல்ல முடியாதபடி அவாள் மறைத்த Dravidian Evolution.

மன்னர்: ஆ! ஒரு நிமிஷம். Darwin எங்கிருந்து வந்தார்?

பாரி: Darwin என்பதே தமிழ் பெயர்.

மன்னர்: எப்படி?

பாரி: “தருவின்”… மரத்தினுடையது என்று பொருள்.

தரு + இன் = தருவின். அதை வெள்ளைக்கார ஆங்கிலேயன் Darwin ஆக்கிட்டான்.

மன்னர்: அது கொஞ்சம்… …

பாரி: உங்களுக்கு எல்லாமே கொஞ்சம்தான் இருக்கும். உண்மை பெரியது.

அதெல்லாம் சரி… நான் இன்னும் சொல்லவே இல்லை இதை… நான் சொல்லவந்த விஷயமே வேறு!

மன்னர்: ஐயோ! இன்னும் வேற ஏதோவா? அது எதொ பின்னாடி வந்ததா?

பாரி: திசை திருப்பவேண்டாம்… எ, ஏக்கு அப்புறம் என்ன எழுத்து?

மன்னர்: ஐ.

பாரி: அதான்! இன்றைக்கு உலகம் பேசுற அடுத்த பெரிய technology என்ன?

AI.

தமிழ்ல? ஏ-ஐ…

மன்னர்: ஐ! இது உண்மைதான்!! 

பாரி: புரிஞ்சிடிச்சா? அப்படின்னா எல்லாமே ஒரு evolutionary sequence தான்…

எலியன் >> ஏலியன் >> ஐலியன்!

அதாவது, Rat intelligence >> Alien intelligence >> Artificial Intelligence!

இதைத்தான் நம்ப சங்ககாலத் தமிழன் ஆயிரக்கணக்கான வருடங்களுக்கு முன்பே உயிரெழுத்து வரிசையில encode பண்ணி வச்சிருக்கான்.

மன்னர்: இதை நான் முழுமையாக ஏற்றுக்கொள்ள முடியாது. வாதம் சரியில்லை…

பாரி: ஏன்?

மன்னர்: நீங்க வரலாற்றை linguistic-ஆ மட்டும் பார்க்கிறீங்க. Material evidence பார்க்கணும்.

என்னிடம் நாணயம் இருக்கு.

பாரி: என்ன நாணயம்?

மன்னர்: ஒரு coin.

ஒரு பக்கம் எலி மாதிரி ஒரு உருவம். இன்னொரு பக்கம் வட்டம். நடுவுல மூன்று புள்ளி.

பாரி: எங்க கிடைச்சது?

மன்னர்: அதை இப்ப சொல்ல முடியாது.

பாரி: Carbon dating?

மன்னர்: Coin-ஐ carbon dating செய்ய முடியாது.

பாரி: அப்படித்தான் establishment சொல்லும்! தமிழன் என்ன சான்று கொடுத்தாலும் ஒத்துக்க மாட்டானுங்க… கீழடில…

மன்னர்: Metal-க்கு carbon இல்லை.

பாரி: Metal-க்கு carbon இல்லையா? Steel-ல carbon இருக்கே!

மன்னர்: இது steel இல்லை.

பாரி: அப்ப இன்னும் suspicious. ஒரு எடத்துல நிக்காம குதிச்சிக்கிட்டே ஒண்ணுலேர்ந்து இன்னோணுக்குத் தாவுறீங்க…

மன்னர்: நான் சொல்ல வர்றது என்னன்னா, அந்த மூன்று புள்ளி சாதாரணமில்லை. Orion Belt-ல மூன்று நட்சத்திரம் இருக்கு.

பாரி: மூன் று?? அப்ப ஏதாவது சந்திரன் தொடர்பு இருக்குங்கிறீங்களா? இல்லாட்டா ஏதாவது மூஞ்சூறு வகை குறியீடோ? ஆதித் தமிழன்… …

மன்னர்: நீங்கதான் குதிச்சிக்கிட்டே இருக்கீங்க…நான் சொல்லவந்தது- Coin-ல மூன்று.

பாரி: அப்ப?

மன்னர்: Connection. தொடர்பு படுத்தி மாத்தி யோசீங்க…

பாரி: இல்லை. நீங்க இங்கே ஒரு பெரிய தவறு பண்றீங்க.

Orion என்பதே தமிழ்ச் சொல்.

மன்னர்: எப்படி?

பாரி: “ஓர் இயன்”.

ஒரே ஒரு மனிதன். ஓர் + இயன் = ஓரியன்.

பிறகு Greek-காரன் Orion. திருடிக்கிட்டான்… சங்ககாலத்துல இங்க வந்து மிளகு வாங்கிட்டுப் போகாம, பிச்சைக்காரப் பசங்க நம்ப பண்பாட்டுக் கூறுகள திருடிக்கிட்டாங்க… ஆரியன் உடந்தையா இருந்திருக்கான்… 

ஆரியன் X ஓரியன் என்பது ஆதிகாலத்துலேர்ந்து தொடருது…

மன்னர்: அப்படியானால் Greek civilization…

பாரி: தமிழர் கிளை.

மன்னர்: எகிப்து? சுமேரியா? மாயா? மச்சீந்திரா??

பாரி: எல்லாம் தமிழர் கிளைகள்

மன்னர்: Aztec?

பாரி: Signal weak. ஆனாலும் வாய்ப்பு இருக்கு. தேவனேயப் பாவாணர் அப்டிதான் சொல்லியிருக்கார்…

மன்னர்: Neanderthal?

பாரி: அவங்க Tamil அல்ல. அவர்கள் நம்மிடம் வந்து வேலை பார்த்தவர்கள். நம் அடிமைகள்…

நியாண்டர் செல்வன் அப்டீன்னு ஒருத்தர் ஹண்டர்-கேதரரா தமிழகத்துல பணி செய்து வேட்டையாடி கெடச்சத வெச்சி, ஃபேஸ்புக்குல பேலியோ டயட் சாப்டிட்டு இருந்தார் – உங்களுக்கு நினைவிருக்கா? எல்லாம் பண்பாடற்ற காட்டுமிராண்டி கும்பல் அடிமைங்க…

மன்னர்: அப்ப எதுக்கு அவங்கள அடிமையா வெச்சிருந்தோம்?

பாரி: Kumari Kandam Metro Phase 2. உடலுழைப்பை உயிர திரணமா மதிச்சி அந்த அடிமேங்கதான் அப்படி அசுரவேலைங்கள செய்யமுடியும்…

…தமிழர்கள் எல்லாம் சங்ககாலத்துல பிஸியா இருந்தோமில்ல… ஆற்றுப்படை… 

மன்னர்: நான் இன்னொரு முக்கியமான archaeological evidence சொல்றேன்.

Mars-க்கு தமிழ்ல என்ன?

பாரி: செவ்வாய்.

மன்னர்: அதுதான்!  NASA Mars-ஐ “Mars” என்கிறது. தமிழன் ஆயிரம் வருடங்களுக்கு முன்னாடியே அதுக்கு செவ்வாய்ன்னு பெயர் வைத்திருக்கான். அவன் அங்கே போகாம எப்படி பெயர் வைத்தான்?

பாரி: எப்டீ? சிவந்த வாய்? அல்லது க்ளாஸ்ஸிகல் வாய்? 

மன்னர்:அப்படின்னா தமிழர்கள் solar system-ஐ ஏற்கெனவே survey பண்ணியிருக்காங்க – அவ்வளவுதான் அர்த்தம்…

பாரி: யோசிச்சா – அது Survey மட்டும் இல்லை. Colony.

மன்னர்: ஆதாரம்?

பாரி: “செவ்வாய் தோஷம்”. ஏன் Mars-ல இருக்கிற விஷயம் தமிழ்நாட்டுல கல்யாணத்தை பாதிக்கணும்? Interplanetary administrative jurisdiction!

மன்னர்: அடடா! “செவ்வாய் தோசை” அப்டீங்கறதுலேர்ந்தும் வந்திருக்கும்… அதாவது குமரிக் கண்டத்துக் குமரி ஒருத்தி அவளுடைய செம்பவள வாயைத் திறந்து தோசைத் துணுக்கைச் சாப்பிட்டாள்… இதுதான் உண்மை.

பாரி: Mars Embassy இங்க இருந்திருக்கு. அவனுங்க இங்க வந்திருக்கானுவ…பெரிய அளவில் தமிழன் செவ்வாய் கிரகத்துக்கு ஏற்றுமதி செய்து பொருளீட்டியதற்கு இதே ஒரு பெரிய சான்று…

மன்னர்: ஆ! இது எனக்கே புது தகவலா இருக்கே! எங்கே அந்த Embassy?

பாரி: செவ்வாய்ப்பேட்டை. சேலத்துல இன்னிக்குக் கூட இருக்கு!

மன்னர்: ஆனா நான் இன்னும் deep ஆ போறேன்.

Tamil alphabet மொத்தம் எத்தனை?

பாரி: 247.

மன்னர்: 247. அதை எப்படி எழுதுவீங்க English-ல?

24/7.

பாரி: அய்யய்யோ!

மன்னர்:Tamil civilisation was operational 24/7! தொடர்ந்து அயராமல் கண் துஞ்சாமல் ஆதித் தமிழன் உழைத்திருக்கிறான்…

இதுதான் 247 letters-ன் உண்மையான secret.

பாரி: அய்யோ! நான் இதை miss பண்ணிட்டேன்.

மன்னர்:அதான் field research வேணும்னு சொல்றேன்.

12 உயிர்.

18 மெய்.

12 × 18?

பாரி: 216.

மன்னர்: 216 என்ன?

பாரி: Six cube. 6 × 6 × 6.

மன்னர்: 666!

பாரி: இல்லை, 216.

மன்னர்: Numerically வேற. Symbolically 666. சாத்தான் பைபிள்ல சொல்லியிருக்கிற எண்!!

பாரி: அப்ப Illuminati!  இல்லுமினேட்டி கம்மினாட்டிங்க… சதிகாரனுங்க

மன்னர்: அதே!

இப்ப புரியுதா ஏன் அவர்கள் தமிழ் இலக்கணத்தைப் படிக்க விடமாட்டேங்கிறாங்க?

பாரி: யார் படிக்க விடலை?

மன்னர்: அவர்கள்.

பாரி: அவர்கள் யார்?

மன்னர்:அவாள் பெயர நாம்ப சொல்லக்கூடாது.

பாரி: ஆரிய Illuminati?

மன்னர்: நீங்களே சொல்லிட்டீங்க.

பாரி: சொல்லப்போனா actually “Illuminati” என்பதே தமிழிலிருந்து போன வார்த்தை.

மன்னர்: இதையும் விடப் போறதில்லையா… வேர்ச்சொல் ஆராய்ச்சிய ஆரம்பிச்சிட்டீங்களா?

பாரி: “இல் + உமி + நாட்டி.”

இல்லத்தில் உமியை நாட்டியவர்கள். Ancient domestic energy technology.

மன்னர்: உமி என்றால்?

பாரி: அதை அடுத்த வீடியோவில் சொல்றேன்.

Subscribers 5 லட்சம் வந்ததும் Part 2.

மன்னர்: Scientific information ஐ ஆதாரத்தோட பகிர்வதற்கு subscriber target எதுக்கு?

பாரி: Research funding. நம்ப தர்க்கரீதியான ஆராய்ச்சிங்களுக்கும் நிதி தேவைப்படுதுல்ல

மன்னர்: எனக்கு Area 51 பற்றியும் ஒரு theory இருக்கு.

பாரி: Area 51 என்ற பெயரே suspicious. 5 + 1 = 6.

Six directions? வடக்கு, தெற்கு, கிழக்கு, மேற்கு, மேல், கீழ்.

ஆறு திசைகள். ஆறு என்றால்?

மன்னர்: கூவம்? 

பாரி: மாத்தி – தமிழ்ப் பண்பாடோட யோசீங்க…

மன்னர்: ஆ! முருகன்!!

பாரி: Exactly! ஆறுமுகம்.

Six faces. Area 51 = Six. Murugan = Six. Murugan = extraterrestrial commander.

மன்னர்: இது கொஞ்சம் ஓவர். நான் இதை ஏற்க மாட்டேன்.

பாரி: ஏன்?

மன்னர்: முருகனை alien என்று சொல்வது colonial framing.

Alien தான் முருகனுடைய descendant.

பாரி:எப்படிங்க சொல்றீங்க?

மன்னர்:முருகனுக்கு வேல். Alien spacecraft-க்கு?

பாரி: Antenna?

மன்னர்: அதுதான் broken Vel.

பாரி: என்னங்க இது?

மன்னர்: நீங்க imagination-ஐ evidence-ஆ பயன்படுத்துறீங்க. நான் evidence-ஐ imagination-ஆ பயன்படுத்துறேன். Difference புரிஞ்சுக்கோங்க.

(...அப்போது ஸ்டூடியோவின் ஒரு மூலையில் இருந்து… கீச்… கீச்… என்று சத்தம். பத்ரியிடம் இது குறித்து, ஒரு பிராது வைக்கவேண்டுமோ?)

பாரி: ஒரு நிமிஷம்.

மன்னர்: என்ன?

பாரி: Camera 3 zoom பண்ணுங்க.

மேசைக்குக் கீழே ஒரு எலி.

(இருவரும் அமைதி காத்தனர்… எலி இவர்களைப் பார்த்தது.  இருவரும் எலியைப் பார்த்தார்கள். மூவரையும் நான் பார்த்தேன். எஸ்ராமகிருஷ்ணன் உஷார்!!)

பாரி மெதுவாக: நான் அப்பவே சொன்னேன்ல…

மன்னர்: என்ன?

பாரி: They are already among us. நம்ம கூடவே எப்போதுமே நம்ப மூதாதை எலியன்கள் இருக்கிறார்கள்… நமக்குதான் அவங்களப் பத்தின புரிதல் இல்ல…

(சரி. அடுத்த பகுதியில் இச்சுவையான உரையாடல் தொடரலாம்…)